شوية سآلة مع رشة مسخرة

موضوع: شوية سآلة مع رشة مسخرة 20/9/2008, 5:30 pm

كن مثل «أبو عصام»

تنظرُ حولك، فترى الناس كلها تحبُّ «أبو عصام»، والتأكيد مو على طلته البهية وصلعته الألمعية، بالعكس، حتى أنو «أبو عصام» مو أصلع، وخزاة العين إن شاء الله ألف مخرز بيشكوا فيها هي وأختها الحولة اللي بجنبها وهي وعم تصيب «أبو عصام» بالعين، ليش، لأنو «أبو عصام» آدمي، طيب طالما آدمي ليش ما بتصير متله .. غيره؟!..

شو غيره كمان.. بحبه لـ «أبو عصام» لأنو حكيم ورايق وبيحل أموره دون شوشرة وبهدلة، طيب يا أخي بتحبه مشان كل هالصفات وأنت ما بتملك واحدة منها، إذا عملت فعل خير بمقعدة هالزمان بتفضح الدنيا وبتقعد بتتباهى بشخصيتك وإنجازاتك الخيرية، وإذا عملت منيحة مع واحد بتشل عرضه وأنت وعم تحكي عنها وعنه للعالم وبتكفّره بالساعة اللي أجا فيها لعندك وطلب منك توقِّف جنبه بهالمشكلة، بتكره حياتك وبتصير المشكلة وعذاباتها أهون عندك من إذاعة رفيقك اللي خدمك بمقعدة الزمان خدمة، أما إذا انحطيت بموقف وصارت هيبتك من هيبة «أبو عصام» بتقوم بتفقد كل ذرة حكمة وبتصير بتفرم بالعالم والعباد يمين شمال جنوب أفريقيا شرق آسيا غرب أوروبا وسط أمريكا والبحر الكاريبي يا حبيبي، بيكبر راسك وما بتعود الدنيا بتوسعك، وبتصير قدّام المراية أكبر من نيلسون مانديلا وأهم من أديس أبابا، بابا بابا يا أنخابا.. تملأ أذني .. بالسبابا، حتى على أولادك بتصير بتشوف حالك، تنسى أنك أخ.. بتنسي أنِّك أخت.. بتنسى أنك ابن.. وبس بتتذكر أنك هلأ قوي، هلأ الكل بدهم رضاك، مع أنو الرضا من رب العالمين بينطلب يا عيني، وشكلك مضروب ضربة قوية على عينك يا ليلي يا عيني، وعلى راسك يا راسي أمان، وما عدت عرفت وين أنت ومين أنت وشو أنت، وما عاد تذكرت من حالك غير شوفة حالك، ومع الأيام بيصير ابنك بينسى يقل لك يا بابا، وأنت بتنسى شوي شوي أنك بابا، وبتصير أختك بتخفف تليفونات لعندك، لأنها صارت تخاف من أنها تكون عم تزعجك، وشوي وشوي وبجلسة انفرادية مع ذاتك بتمحي من على موبايلك أرقام كل أخواتك، لأنهم بالعادة هم اللي بيدقولك، وبتحط محل أرقامهم أرقام ناس أهم.. منهم البيك ومنهم الآغا ومنهم الأستاذ ومنهم مولانا ومنهم تاج راسنا وباقي الأشخاص الذين هم عندك أهم من أهلك، وبتقل لي إنك بتحب «أبو عصام»، بتشوفه مثال؟!!.. طيب احتذِ يا صاح، اعتبر يا مهم يا مُعتَبَر، تعلَّم يا مثقف يا متعلم، تعلم هالشغلات الحلوة من حبيبك «أبو عصام»!!!!! كن مثل من تحب، كن مثل ما تحب أن يكون عليه بطلك، كن بطلاً، ولن نكون إلا معك، وألله يرحمك يا «أبو عصام».. ما عاد في من أمثالك بهالزمان. بل إذا صار وطلع واحد مثلك رح يقولوا عنه حمار!!!.. متل ما عم قلك، لأنو الأكابر والشهم والمعدَّل والطيب وابن الحلال اسمه بلغة هالأيام حمار؟!!...!!...؟...!!!!....؟؟.!.؟...؟؟..!. سلم موسيقي محلّي من التعجب والاستفهامات....؟!!!!!!

شروي غروي:
إذا شغلت مخك منيح وإنت وعم تتفرَّج على حلقات المسلسل السوبر اكشن الشريطة الحمرا، وخليت تلافيف مخك تتعب شوي، يا حزرك يا فزرك شو بتكتشف؟!.. ياسيدي بتكتشف إذا طابقت عدد المصابين بالإيدز بالعيلة مع عدد أفراد العيلة بتطلع نسبة المصابين 50 % !!..إي والله ما عم زل عليكم بحرف، لأن فوزية وأخوها حماد المستشرف مصابين وعدد أفراد عيلتهم 4.. معناها النصف مصاب، وكمان حسب شارة المسلسل الفظيعة فإنَّ ابن المخرج وأخوه كمان رح ينصابوا بالإيدز وعدد الأفراد كمان أربعة.. يعني النصف مصاب!! لا حول ولاقوة إلا بالله، والله هالاحصائيات بتخوِّف يالطيف الطف فينا يارب.. وليييي.

ما بقي بالميدان غير حديدان

صدقوني ما عم أخترع هاد الشي من عندي، اكتشف المخرج يوسف رزق مجرة جديدة غير اللي كوكبنا موجود فيها اسمها مجرة الخط الأحمر، وفيها كوكبة من النجوم، وإذا حابين تتأكَّدوا شوفوا شارة المسلسل بتلاقوا كل أسماء النجوم اللي موجودة بهاي المجرة، لك ما ضل ممثل بهاد المسلسل وما أطلقوا عليه لقب نجم.. النجم الكبير والنجم القدير والنجم الفنان والنجم لمعجزة والبطل النجم.. يعني ما صفي غير نجوم الضهر وإن شاء الله رح نشوفها بهاد المسلسل..

صراع بدون إيدز
ما لكم مستغربين أنو ما في ولا واحد مإيدز أو مصاب بالإيدز بمسلسل صراع على الرمال؟!.. لا تستغربوا سؤالي.. شو نسيتم أنو المسلسل من تأليف هاني السعدي؟!!!!!!!!...

تك..... نلوجيا
أحلى شغلة انو مبارح اكتشفنا قديش كان الطب متقدم ببلدنا ياجماعة، لك تخيلوا أنهم شرَّحوا جثة الطفل المغدور وطلَّعوا منها رصاص واكتشفوا من خلاله أن المسدس ألماني!! بس مو هون الحبكة.. الحبكة لما سلموا الطفل لأهله وجابوه على حارة الماوي وكان أبوه حامله... الاكتشاف المميز هو أنَّ الولد بكامل ثيابه وحتى ببقعة الضوء عفواً ببقعة الدم على ملابسه يعني الطب أيامها ما كان يحتاج انو يشرِّح الجثة متل هالأيام، لا كانوا يفتحوا بطن ولادهم يحزنون، ليزر.. من برة لبرة بينعرف كل شي!!

سبحان مغيِّر الأحوال
* أبو حاتم بالجزء الأول والتاني كان رجلا شرقياً بكل معنى الكلمة، يغار على عيلته كتيييييييييير، وبيخاف عليهم من دبة الأبرة وبيعمل خنايق مشان حريمه الله يستر عليهن أجمعات، وقد رفض فتح باب مقابل بيته، بس بالجزء التالت ومتل ما بتعرف بعد سنة النفوس بتتغيَّر، تغيَّرت نفسية الزلمة عن الأجزاء السابقة، وصار أبو حاتم يكشف حريماته على الرجال، ومو بس هيك.. لك وافق يشغلهن دكاترة وممرضات، والله أنا أعتقد أنَّ «أبو حاتم» هو من أشعل شعلة الانفتاح بمجتمعنا، ولولاه لكنا لساتنا بزمن العبايات.
* يا سيدي بنته لـ»أبو خاطر»، مو زهرة، التانية نسيت اسمها، شو بدك بطول الحكي كانت بالأجزاء السابقة أيام ديمة قندلفت كتير نرفوزة وعصبية وغيورة، بس سبحان مغيِّر الأحوال بهالجزء صايرة طبيعية وتحب الخير وتساعد أختها وتظل تبكي يا عيني..
يلمناصرة قضية أبو عصام العادلة الرجاء إرسال أية معلومة تحصل عليها مهما كانت تافهة فربما تفيدنا في التحقيق عسى ولعل نراه يعود من الشهادة إلى النصر في المشهد الأول من الجزء الرابع، وإنا على دربك لسائرون
الرجاء كتابة جملة (أبو عصام لن ننساك) على موضوع الرسالة، وبحياة الله تدعمونا بالاقتراحات والتفتيقات. لن ننساك
الدم دمين والتار بتارين والبادي أظلم شعار اتخذته حارة الماوي في حربها على حارة الضبع
و الي مودوع تاني خص نص لابو عصام
انتظروني
سامحوني على طول الموضوع بس نشالله يعجبكن

موضوع: رد: شوية سآلة مع رشة مسخرة 20/9/2008, 8:31 pm

هلق الدراما السورية حلوة

بس لما بدهم يمطو الموضوع عطول ببيخوه

مابعرف ماحسيت باب الحارة هالسنة متل السنة اللي ققبلها

ولهيك ماني متابعه

شكرا كتير ام اللول

وبانتظار الحلقات القادمة

موضوع: رد: شوية سآلة مع رشة مسخرة 22/9/2008, 6:20 pm

هههههههههههههههههههه

ياااا لطيف شو قوي هالموضوع

بشرفي اذا بينزل بشي جريدة بيضرب ضرب

انا متل ما قال محمد ما عم تابع باب الحارة هالسنة لانو مو متل السنين يللي مضت
وبدي اشرح وجهة نظري بهالموضوع :
انوالدراما السورية بتحتل الصدراة بالفضائيات العربية لدرجة انو صار التمويل العربي عم يطلب دراما بمواصفات سورية من دون شروط اساسية

وغير هيك الدراما السورية الا نكهة خاااصة بالتمثيل والاخراج والعلاقات الاجتماعية و و و ......... وهالمواصفات ما منقدر نشووفا بالدرامات العربية التانية

بس تقريبا في تراجع بالسنوات الاخيرة للدراما تبعنا وبالتالي تراجع عروضها بسبب مشااركة الفانين السوريين بالدراما المصرية

وانا بشووف انو كل مين بيحكي عالدراما السورية ناتج عن الشي يللي بيرسمو بخيالو عنها مو من حالا .... يعني اذا عجبوا العمل فيا مدح واذا غاااب عنها قدح

مشكووووووورة كتيير لولو

موضوع: رد: شوية سآلة مع رشة مسخرة 22/9/2008, 7:04 pm

ميرسي ام اللول على هالموضوع الحلو
بس أد ما صار الدراما السوريه مافي منها
ومحتله كل المحطات
ولو مو عاجبتك كنتي ما كتبتي هالتعاليق معناها انتي كنتي متابعه ههههههههههه
تقبلي مروري

موضوع: رد: شوية سآلة مع رشة مسخرة 24/9/2008, 12:55 pm

يا جماعة انا اول عاشقة للدراما السورية و كل شي سوري
مو اعتراضي هون
اعتراضي بباب الحارة انو كتير شط و مط و كل سنة عم يتلع ابيخ من السنة يلي قبلا
اما الخط الاحمر فهو مسلسل اكتر من رائع قصة و تمثيل و اخراج مع انو في شوية مبالغة بانو يخلوا تلات ارباع ابطال المسلسل بالمصح بس فينا نعتبرا توعية زايدة لشبابنا
الموضوع تغيير جو مع شوية نقد مو اكتر

احبائي محمد و جوليانو و بنوتة حلوة
منورين ميرسي لمروركن

» شوية مسخرة ع الحكي الشامي سامحونا شاميين
» شوية نكت
» شوية نكت من حمص
» شوية نكت
» شوية نكت