تكسي ..تكسي.....لوين يابي

هلئ من جديد صارت معي كم شغلة
بتخلي الواحد يعبئ كتير و يحئن و يصير بدو يفش خلئو
بئا أنا لئيت انو
فش خلئي بكم سطر أحسن ما فش خلئي بالشي يلي مئروء منو
هلئ بدي احكي عن
شغلة أكتركن بتعرفوها و خصة يلي ساكنين بالشام
أصة التكاسي العجيبة
هلئ الفكرة بالموضوع هية انو صايرين التكاسي الحمد لله عنا كلن مأنزعين و
يلي بيعجبو مشوارك بياخد و يلي ما بيعجبو بأحطلك بكل بساطة
و الأحلا
من هيك انو صايرين خطوط يعني متلن متل السرافيس يعني مثال بتأشر لتكسي فاضي
بهدي تهداية بدون ما يوئف عالآخير و بيسألك مثلاً (برزة) , و مشواركن بكون
فرضاً عالمزة فببساطة شوفير التكسي بيدعس بنزين و بضلو ساحب , حتى انو وئت
يهدي بكون لساتو عالغيار التاني بالسيارة يعني حتى ما كلف خاطرو ووئف متل
العالم منشان يحكي معك , بتأشر للي بعدو بوئف و بئلك جرمانا و غيرو غيرو
لحتى تحس حالك انو ببرنامج عم يعدو فيه اسماء مناطق بالشام .
و الحلو
بالموضوع انو ازا كان هالشخص يلي بالموقف من الناس يلي بياخدو تكاسي كتير
فلح يلائي حالو خلال 3 تيام أنهى دورة مكثفة كتير بالتعرف على اسماء مناطق
بالشام شي سمعان عنو و شي محسب انو هالاسم بس بالصين موجود و بعدين من شي
شوفير تكسي اكتشف انو في بالشام منطئة بنفس الاسم .
من كم يوم كانت
الدنية ليل و انا كنت كتير مستعجل بالرجعة عالبيت و المشوار أريب كتير كان
يعني من ساحة باب توما عالزبلطاني وبس يعني ازا باخدا مشي بتاخد معي 8
دئايئ عالبيت بس انا كان لازم اختصر الموضوع أد ما بحسن , المهم يوميتا انا
ضربت اعلى رقم قياسي بعدد التكاسي يلي عملو معي هالحركة هي , 26 تكسي
وئفولي و كل واحد يحددلي مسارو و ولا واحد فيهن تحنن عليي و
وصلني هالشارعين يلي بياخدو معو 3 دئايئ مو أكتر , المهم بعد ما تجاوز
العدد عشرين سيارة معي صرت وئت أشر لشي واحد أبل ما يفتح تمو بحرف أللو انو
عمي يستر اختك بدك توصلني لوين ما بدي ازا بدك تشرط عليي مشوار ما بدي , و
الشي الحلو انو 6 شوفيرية ما عجبن الحكي , لحتى آخر شي الله جمعني بشوفير
ماشي حالو و طالع يشتغل , و الحلو انو وئفلي بالصدفة وكان عندو استعداد
ياخدني على قبرص المهم انو ما يطلع معو زلمة معين كان وائف جنبي و ناطر
تكسي , يعني بمعنى تاني يلي خلاني اطلع مع هالزلمة ما هوة حب الشغل و انما
كرهو لنوع معين من الناس , يالله منيح على كل حال انا بآزرو يعني بهالفكرة
لأنو انا تعدت سمايي من نفس هالنوع هاد يلي صارو مالن حل , على كل حال مو
هادا موضوعي اليوم انا بس بدي احكي عالتكاسي و مأساتنا معهن .
طيب هلئ
انو بالآخير شو الحل معهن يا ترى ؟؟ , طيب و الله مو ضروري اني كون خليجي و
ضروري اني كون بنت لحتى آخد حئي كإنسان بي\أني اطلع بتكسي ازا كنت مستعجل
شوي يعني و الله الواحد بصير يفكر انو الغلط منو بالآخير مو من التكاسي .
طيب المهم و بعدين انو يعني بدا حل الأصة لأنو جد صار الوضع بأسي الكلاب ,
لك العما و الله شي بجنن .
انو ببلاد برا وئت الواحد بأشر لتكسي و
التكسي بوئفلو , نشالله بئلو بدي روح عالهفا بياخدو بدون ولا حرف نقاش و
الا بيتبهدل .
لك الأحلا من هيك كمان انو ما عاد عجبهن لا العداد ولا
حتى الزيادة يلي بياخدوها فوء العداد , يعني ازا كان عدادو 12 ليرة مثلاً
ما عاد رضي باقل من 25 أو حتى 30 يعني على هوا آدميتو للشوفير , و صار عندن
المشوار الطبيعي جوات الشام عداد و نص و ازا لبرات الشام أبصر أديش بصير
بدو , لك عم طلع هيك انو و الله مصلحة مربحة , لك ليش الواحد لحتى يدرس أو
يتعلم مصلحة أو أي شي , يروح يطلعلو شهادة سوائة و ازا معو شوية مصاري
يسناول شي تكسي يشتغل عليها , و الله على هالمعدل من النهب بيئبر الفئر
بسرعة عجيبة , و ازا ما معو كتير مصاري يستثمرلو شي سيارة أو يشتغل عليها
شوفير عادي بحصة من الغلة و خلصنا و خلينا كلنا نصير شوفيرية تكاسي و يا
سلام و كلياتنا مننبسط كتير و الله حيو الشباب , بلا دراسة بلا ئاء و بلا
مصلحة كمان , خليها تصير البلد كلا شوفيرية تكاسي , و الأصفر يغطي دمشق
بصير , و هوة خلئة الله يغطيها بين تكاسي و بين شركة أريبا يلي صارت أم تي
أع و صارت أفشل من أول و لسا الخير لأدام نشالله انتو بس ستنو شوي و شوفو
يعني عادي الموضوع بلشنا نتعود و الحمد لله .
كيف ما التفتنا منلائي
حدا يستحكمنا و ينهبنا و كأنو متوسط دخل القرد (الفرد) عنا شي تلاتمية ألف
مليون بالشهر و عادي ازا بعزئلو شوي ما بأثر و ما بيوصل لآخر الشهر ملعون
الأهل تبعو .

هلئ المهم انا لعيت كتير
بس و الله من حرئة ألبي لأنو جد لك الله
بيكره الاستحكام و الابتزاز .

المهم انو الى اللقاء في الحلقة
القادمة من مغامرات صراع الجبابرة و كل الشباب
الطيبة و الله محييكن و على راسي كلكن يابي .[/size]

لاحظت هالشغلى وحتى بحلب هيك صايرة هالظاهرة


بس ساووا متلنا اشر لتكسي وخرط اركب وقله وصلنا
ما فيه الشوفير ينزلنا هههههههههههههههه

قولتك الشغلة مربحة تعا منتشارك انا وياك بالنص هااااااااااااااااااا

هههههههههههههه

تحياتي وتقبل مروري